O alcalde de Ferrol, presidirá o vindeiro venres, día 7 de xuño de 2013, a cerimonia oficial da entrega da distinción de Fillo Predilecto de Ferrol ao deportista Javier Gómez Noya, que marcou un fito na historia da cidade e do deporte olímpico español ao conseguir a medalla de prata na proba de triatlón dos Xogos Olímpicos de Londres celebrados o verán pasado. O acto institucional terá lugar no Teatro Jofre, a partir das 12.00 horas. Ao mesmo asistirán, ademais de familiares e amigos de Gómez Noya, noveis deportistas da cidade e alumnos/as dos centros de ensino nos que cursou estudos o medallista ferrolán, así como representantes dos clubs do municipio nos que se iniciou no práctica deportiva.

O conxunto da Corporación Municipal de Ferrol acordou por unanimidade, en sesión plenaria celebrada o 27 de setembro de 2012 e  a proposta do alcalde, conceder a Gómez Noya a máis alta distinción que a cidade concede ás persoas nadas na mesma. Rey Varela destacou que o triatleta ferrolán “é a imaxe que todos queremos para a nosa cidade, posto que representa  o traballo, o esforzo, o tesón e o éxito”. “Gómez Noya xa conta cos recoñecementos de Ferrolán do Ano e Deportistas do Ano en varias ocasións, da nome ao complexo polideportivo de Caranza e o título de Fillo Predilecto de Ferrol é a distinción que lle faltaba e que debe ter quen é o portador da primeira medalla olímpica da cidade”, engadiu o rexedor municipal.

Así mesmo, Rey Varela manifestou que a medalla de prata de Londres 2012 é un fito máis nos numerosos éxitos que o deportista ferrolán ten acadados na súa intensa traxectoria. Unha carreira deportiva na que a pesar da súa mocidade xa conta cos Campionatos de Europa de Triatlón nos anos 2012, 2009 e 2007 e os Campionatos do Mundo de 2008 e 2010. “Gómez Noya é un modelo a seguir para todos os deportistas, pero ademais das súas capacidades físicas cómpre salientar a súa forma de ser, o seu voluntarismo, humildade e espírito de sacrificio”, dixo o alcalde. Por último, Rey Varela apuntou que o acto de entrega da distinción de Fillo Predilecto de Ferrol a Gómez Noya “é unha mostra do cariño, do agradecemento e do orgullo da cidade por contar entre os seus veciños con este gran deportista”.