O Concello celebrará no mes de outubro unhas xornadas na súa memoria cuxo remate se fará coincidir coa entrega deste prestixioso premio, convocado en colaboración coa Asociación Cultural Medulio. Unha iniciativa que tal e como destacou a edil de Cultura, Mercedes Carbajales, servirá para rendir unha homenaxe á achega fundamental que fixo á cultura do país Carvalho Calero -Ferrol, 1910- e pola que o Concello e a sociedade en xeral reivindican o Día das Letras Galegas do 2011 para o ferrolán. Unha petición que xa fixera chegar á Real Academia Galega e que o Concello confía acadar para o 17 de Maio do próximo ano.

Segundo as bases do certame, elaboradas coa entidade Medulio, haberá dúas modalidades: Ensaio e Creación Literaria ou Narración Curta. O prazo para remitir os traballos, que terán que estar escritos en lingua galega con liberdade normativa e ser inéditos, abriráse do 15 de abril ao 15 de xuño. Deberanse entregar no Rexistro Xeral do Concello de Ferrol indicando no sobre “XVIII Certamen Carvalho Calero” .

A dotación para cada unha das modalidades, será de 3.700 euros e os traballos serán publicados polo Concello de Ferrol. Por outra banda, a concelleira de Cultura avanzou que este premio pasará a ser bianual, polo que a próxima edición celebraráse no ano 2012.