Por cuarto ano consecutivo, o Plan de Dinamización do Producto Turístico Ferrol-Ortegal estará representado en Fitur e contará cun mostrador propio dentro do stand de Turgalicia, a Sociedade da Imaxe e Promoción Turística de Galicia. Segundo explicou a Radiofusión a xerente do Plan, Pilar López, alí se poderán atopar folletos de todo tipo e información relacionada cos quince concellos do eixo Ferrol-Ortegal. A maiores, o xoves presentaranse tres novos productos turísticos cos que se pretende enriquecer a oferta xa existente: a plataforma comercial de actividades “Tempo de lecer”, novos paquetes turísticos para estadías tanto na zona rural como na urbana e os denominados “bonos de lecer”.
Ademais de estar representados a través do Plan de Dinamización do Producto Turístico Ferrol-Ortegal, algúns concellos da bisbarra contarán cun espazo propio na Feira Internacional do Turismo. Ferrol, por exemplo, levará a FITUR a súa Semana Santa. O Concello anuncia para o xoves un acto protocolario no que se promocionarán de xeito conxunto os actos litúrxicos, as procesións, o salón Equiocio e as visitas guiadas, ademais da oferta gastronómica da cidade, o tren turístico e as actividades culturais que se celebrarán nesas datas.
Tamén Ortigueira aposta un ano máis por Fitur para presentar oficialmente o cartel do vindeiro Festival do Mundo Celta, que se celebrará entre o 8 e o 11 de xullo. A cita será o venres, na caseta de Galicia e dentro do espazo institucional reservado por Turgalicia. A presentación do cartaz -seleccionado entre ducias de propostas que se presentaron ao concurso de deseño convocado polo Concello- correrá a cargo do alcalde ortegano, Rafael Girón, e do conselleiro de Cultura, Roberto Varela.
Outro dos concellos que estará representado nesta edición da Feira Internacional do Turismo de Madrid é o de Ares e tamén no seu stand haberá sorpresas nesta ocasión como a presentación, o venres, dunha nova web do Concello adicada ao turismo, ou a promoción das súas propostas e ofertas turísicas, impulsadas pola propia administración local e por distintas asociación do termo municipal.
