Este domingo 9 o Centro cívico de Canido acolle o evento "Solarpunk. Futuro:tecnoloxía, natureza, comunidade". O antropólogo e científico do CSIC Emilio Santiago pronunciará unha charla (12h) sobre o tema: "Si, hai futuro e ser´asolarpunk". Actuará o trío de corda Kreze (13,30h) e ofreceráse unha paella vegana (14,30h) preparada con cociñas solares. Logo virá o home orquestra-canalla e festivo Zapoitxo (15,30h).

As actividades continuarán o sábado 15 cunha nova xornada dos "Solpores de Canido". A programación arrancará ás 20:00 horas coa actuación de Sofi Peries, artista e DJ galega que fusiona música urbana e electrónica alternativa a través da experimentación sonora e a performance. Ás 21:00 horas será a quenda de MoOoM, un proxecto formado por Ciara Cabodevila, Carlo Jurancelli e Facundo Fernández Alberdi, que presentará Atlántica. Este traballo, editado este ano polo selo Ferror Records, mestura músicas de tradición oral galega con electrónica para crear unha proposta que eles mesmos definen como «folktrónica tradicional». Pechará a noite, a partir das 22:00 horas, a DJ galega REA, cuxos sets percorren estilos como o EBM, o dub techno, o IDM, o electro, o dubstep ou o drum&bass máis experimental.