Mañá, ás 18h00, celebraranse dúas novas conferencias. En primeiro lugar, Xosé Luís Barreiro Rivas, profesor de Ciencia política da USC, falará do esplendor xacobeo na segunda metade do século XVII. A obra de Vaquedano enmárcase nunha época na que, como consecuencia da recepción en España do Concilio de Trento, as peregrinacións a Santiago viven un período de recuperación e esplendor. Paradoxalmente, este esplendor cultural, relixioso, artístico e económico coincide co final da dinastía dos Austrias e a crise definitiva de España como potencia mundial e europea.

Andrés Rosende Valdés, tamén profesor de USC na especialidade de Arte, referirase logo á Compostela que coñeceu Vaquedano. Desde mediados do século XVII e durante o XVIII, Compostela vai experimentar unha serie de intervencións, algunhas de tal envergadura que acabaron definindo o perfil da cidade, a súa esencia, a súa historia e significado. Na Compostela que coñeceu Vaquedano púxose en marcha ese proceso de transformación que, iniciándose na catedral, desbordará cara ao seu contorno e arrastrará o resto da arquitectura institucional e palaciana.