Tierra de Hombres é unha organización sen ánimo de lucro centrada nos dereitos da infancia. Pon en marcha un centenar de proxectos nos países en vías de desenvolvemento, pero en Galicia é coñecida principalmente polo seu programa Viaxe cara á vida, grazas ao cal se traen aos hospitais da comunidade a nenos enfermos que non poden ser tratados nos seus países de orixe.

Coa súa gala bianual a fundación pretende recoñecer o labor das persoas e entidades que traballan a prol dos dereitos dos nenos. O gran protagonista do evento será Asfaw Yemiru, “unha persoa extraordinaria e excelente”, en palabras do delegado en Galicia da entidade, Raúl Besada, quen destacou nos micrófonos de Radiofusión o pouco dado que é o etíope a abandonar o seu traballo sobre o terreo. O evento completarase coa participación dalgúns dos persoeiros da cultura galega. O dramaturgo Lino Braxe exercerá de presentador e a gaiteira Susana Seivane sumarase ao acontecemento coa interpretación ao vivo dalgúns dos seus temas.