Volvendo á liña das series de detectives configurada por Reigosa, cabe destacar o caso xenuíno de Miguel Anxo Fernández, cun total de oito novelas da saga de Frank Soutelo, un detective que sitúa primeiro en América, coa obra, Un cadáver para Marilyn, publicada en 2002, que gañou o premio García Barros, e que, en última instancia, é unha divertida e paródica obra de xénero. Con Lume de cobiza, a cuarta entrega da serie, prodúcese o cambio de escenario do protagonista de América a Galicia, que xa será o lugar de desenvolvemento das tramas de todas as novelas posteriores, Bícame, Frank (2013), Un dente sen cadáver (2016) e A conxura do sete (2022). Nelas, sempre cun estilo cinematográfico e sarcástico, o autor incorpora temáticas propias do entorno no que se move, como poden ser o goce gastronómico, a especulación inmobiliaria ou os incendios forestais, como é o caso da obra recomendada, cuxa trama se centra en agosto de 2006, cando este “lume de cobiza” arrasou o noso territorio. Ademais da saga de Frank Soutelo, Miguel Anxo Fernández é autor de numerosos ensaios históricos e cinematográficos e doutras obras de ficción non relacionadas co xénero negro, entre as que destaca Blues para Moraima, (Premio Blanco Amor, 2016).

Na imaxe: Antonio Tizón

Fotografía Xan Xe