O cambio climático é motivo constante de queixa, pero tamén se pode tratar con humor. Demostrouno a rapazada participante nesta edición do Concurso de BD de Humor Demo Pequeno convodado polo Museo do Humor Xaquín Marín e Demo Editorial. Foron máis de cen os traballos presentados ao certame e había máis, pero, lamentablemente, non cumprían o prazo da convocatoria, segundo contou en Radio Fene Almudena Marcos. 

Na categoría infantil as gañadoras nesta edición foron Inés Bravo Rodríguez, Primeiro Premio, e Enma Rodríguez Grueiro, Segundo Premio. E na categoría xuvenil fíxose co Primeiro Premio Diego Noguerol Feijóo e Carlota Arias Busto gañou o Segundo Premio. Ademais, nesta categoría o xurado concedeu dúas mencións de honra a Paula Pérez Díaz e Valeria Rodríguez García.

Esta tarde, ás cinco, será a entrega de galardóns e a apertura da exposición das mellores historietas desta convocatoria. Poderanse visitar desde hoxe e durante todo o mes de xullo, segundo anunciou a responsable do Museo do Humor Xaquín Marín.