“A Semana Santa en Galicia é aínda unha gran descoñecida”, asegura o presidente de Hércules de Ediciones,  Francisco Rodríguez Iglesias. Co obxectivo de reverter esta situación, a editorial vén de sacar do prelo tres volumes que recollen datos, anécdotas e fotografías arredor da conmemoración da Paixón na nosa comunidade.  

Ocupan lugar de privilexio nesta obra as dúas celebracións de máis sona en Galicia, as de Ferrol e Viveiro, pero hai oco tamén para outras 13 localidades con tradición relixiosa. De feito, a Semana Santa en Galicia, fronte a doutras comunidades, caracterízase pola enorme diversidade. Algunhas citas, como a de Baiona que data do 1574, destacan pola súa antigüidade; outras, caso da representación humana da Paradela, chaman a atención pola súa orixinalidade; e tamén as hai que salientan pola mitoloxía asociada, como demostran as lendas do Santuario Das Hermidas.  

O proxecto de Hércules de Ediciones, titulado “A Semana Santa en Galicia” pretende dar conta de todas estas particularidades e ofrecer unha análise desde catro puntos de vista diferentes: o relixioso, o antropolóxico, o artístico e o económico.