O conselleiro de Sanidade, Jesús Vázquez Almuíña, asegurou que "todos" os casos que se analizan xudicialmente por posibles atrasos no tratamento contra a hepatite C "foron contestados en tempo e forma" e confiou en que a causa se arquive. A querela recolle oito casos concretos de pacientes que faleceron tras recibir o tratamento con meses de espera, algúns deles mesmo antes de ter os fármacos.

O Xulgado de Instrución número 3 de Santiago citou a declarar en calidade de investigados o próximo 28 de abril ao actual xerente da área sanitaria viguesa, Félix Rubial, entón director de Asistencia Sanitaria e á subdirectora de Farmacia, Carolina González-Criado.