Un monumento ás vítimas do franquismo lembra as persoas que perderon a vida pola defensa da liberdade entre 1936 e 1977 no parque Antón Varela en Canido en Ferrol. Ademais de familiares das vítimams, no emotivo  acto interviron tamén os alcaldes de Pontedeume, Ortigueira, Narón e Ferrol e os historiadores Xosé Manuel Suárez e Bernardo Máiz. Tamén estiveron presentes o alcalde de Fene Juventino Trigo e os deputados do BNG Mon Fernández e Xosé Manuel Golpe. 

Xosé Carbón contou en Radio Fene a tortura ao veciño de Pontedeume Eladio Cortizas. En Campolongo atáronno a un cabalo e mandaron ao animal trotar. Sobreviviu pero despois matáronno.

A escultura metálica que o artista Manuel Patinha cedeu desinteresadamente ao Concello de Ferrol instálase sobre unha mesa de formigón recuberta de grantio, con nomes das vítimas gravados en metacrilato e ordenados alfabeticamente dentro de cada ano. A Asociación Memoria Histórica Democrática valora que se honre a aqueles que perderon a vida en defensa dos ideais de progreso e ben común.

Unha das persoas lembradas no monumento é Pedro Rico Rodeiro,vitima dunha execución extraxudicial en Cabanas en agosto de 1947. O seu fillo e a muller  marcharon para Francia. Alí a xente axudounos moito, segundo lembra o neto de Pedro, Constantino Rico. O monumento tamén lembra a Constantino López Marcos. A súa sobriña, emocionada, depositou no monumento un centro floral, ao igual que moitos familiares que deixaron flores e fotografías de lembranza.

A humanidade precisa da memoria e da construción histórica; é dicir, cómpre que interioricemos o noso pasado. Non podemos evolucionar sen saber de onde procedemos, cales son as nosas tradicións, o noso xeito de estarmos no mundo. Necesitamos unha construción cultural, unha xustificación moral que nos protexa ante os acontecementos do porvir, afirma o historiador Emilio Grandio.