Respaldaron a alcaldesa coa súa presencia no salón de plenos a portavoz do BNG Ana Pontón e os ex-alcaldes Xose María Rivera Arnoso e Juventino Trigo. A votación realizouse a man alzada. 

“Prometo por imperativo legal e comprometerme a defender os intereses da veciñanza de Fene e do pobo galego” foi a fórmula escollida pola nova alcaldesa. Moitos aplausos do público que ateigaba o salón refrendaron a elección. “Grazas aos grupos municipais que me trasladaron o seu compromiso polo futuro de Fene, a Pepe e a Tino, ao BNG e a toda a veciñanza” indicou Permui. 

“Sentimos a emoción porque se pon ao fronte do Concello unha muller moi preparada, é un momento moi ilusionante” indicou Ana Pontón: “E moi importante romper os teitos de cristal, cando unha muller da un paso así, dámolo todos e nos axuda a todos a avanzar” sinalou a portavoz do Bloque. O ex-alcalde Juventino Trigo salientou que “estou moi emocionado e moi contento, porque imos ter unha gran alcaldesa”. “Fene vese desde fora do Concello cada dia máis bonito” afirmou con ironia Trigo. 

A nova alcaldesa de Fene, Sandra Permuy, naceu en 1974 e é educadora infantil de profesión. Ten unha longa traxectoria vinculada ao compromiso social e institucional, e forma parte da corporación municipal desde o ano 2015, exercendo diversas responsabilidades de goberno ao longo destes anos. Ata a súa elección como alcaldesa, era primeira tenente de alcalde e concelleira de servizos, persoal, igualdade, benestar social e seguridade. 

Pola súa banda, a nova concelleira que tomou posesión esta tarde en sustitución de Juventino Trigo, Alba García Fariña naceu en Fene en 1991. É terapeuta ocupacional e desenvolve a súa actividade profesional en Teima Down Ferrol, centrando o seu traballo no ámbito das persoas con discapacidade. Durante a súa etapa universitaria estivo vinculada aos Comités e á organización estudantil Erguer, e desde 2019 forma parte da Xunta Directiva do CPS San Valentín.