O Perlío impón a súa pegada no Pote cunha vitoria inapelable ante o Maniños (0-5) O CCRD Perlío arrancou a temporada na Primeira Futgal do xeito máis inmellorable posible: cunha goleada contundente por 0-5 no derbi do concello de Fene ante a Cultural Maniños. A efectividade ofensiva dos visitantes e as paradas clave de Xabi Pita dinamitaron o debut ligueiro no campo do Pote, propiciando un inicio idílico para os azuis e un duro baño de realidade para un Maniños en plena reconstrución tras descender a pasada tempada da Preferente.

O derbi presentábase con moita expectación, pero sobre o céspede quedou patente a diferenza de rodaxe e experiencia entre ambos conxuntos. Aínda que os primeiros dez minutos transcorreron con certa igualdade, o Perlío non tardou en facer valer a súa veteranía na categoría para decantar a balanza de forma case inmediata.

Un vendaval azul na primeira metade

A efectividade visitante comezou a fraguarse no minuto 17, cando Iván San Emeterio asinou o 0-1. A partir dese momento, o Perlío asumiu o control absoluto do choque ante un Maniños desubicado. O castigo non cesou e a punta de lanza azul exhibiu unha pegada demoledora: Óscar e de novo Iván San Emeterio perforaron a meta local para poñer un rotundo 0-3 no marcador antes de chegar ao minuto 35. Co choque encarrilado e a sensación de que a renda puido ser maior, chegouse ao descanso.

Reacción local sen premio e sentenza

Na continuación, a Cultural Maniños saíu con orgullo e buscou meterse no partido. Durante os primeiros 15 ou 20 minutos da segunda parte, os brancos xeraron perigo e dispuxeron de varias ocasións claras para recortar distancias, pero atopáronse cun Xabi Pita impecable baixo os paus do Perlío que desbaratou calquera opción de remontada.Tras resistir o pulo local, o Perlío volveu golpear. No minuto 75, Óscar asinaba o seu dobrete particular poñendo o 0-4 que deixaba o partido totalmente sentenciado. Xa no tramo final, David Parada redondeaba a tarde asinando a "manita" co definitivo 0-5, pechando unha estrea perfecta para os visitantes.

En Radio Fene os adestradores analizan o derbi

Jesús Peña (CCRD Perlío): "Irnos 0-3 ao descanso deunos moita tranquilidade"

O técnico do Perlío mostrouse moi satisfeito por sumar os primeiros tres puntos nun campo sempre complexo:"O partido empezou bastante igualado os primeiros dez minutos, pero a partir do gol de Iván fomos bastante superiores na primeira parte. Fomos ao descanso con 0-3 e creo que incluso puidemos ampliar máis o resultado".Respecto ao baixón no inicio da segunda parte, Peña admitiu que puido haber "exceso de confianza", destacando que o Maniños creou perigo pero "o noso porteiro Xabi resolveu moi ben". Tras o 0-4 no 75, considerou o choque sentenciado. O míster eloxiou a súa parella de atacantes ("Iván e Óscar levan o peso do partido no que ao gol se refire, dánnos moitísimo") e valorou moi positivamente a chegada dos cinco mozos da canteira e de xuvenís (Diego Galdo, Javi Pérez, Lucas, David Parada e Xavi Dopico): "Son rapaces moi noviños, de 18 ou 19 anos, que nos van dar un salto de calidade e de ganas ao bloque que xa mantivemos do ano pasado".

Adrián Martínez (Cultural Maniños): "Temos que reconstruír o proxecto desde cero"

Pola súa banda, o adestrador branco asumiu con naturalidade a derrota e apuntou á experiencia como factor clave:"A clave foi a eficacia de cara ao gol do Perlío e o oficio e experiencia na categoría que nós agora mesmo non temos. Esa superioridade en momentos puntuais e o saber estar no campo foron determinantes".Martínez explicou a profunda metamorfose que sufriu o plantel do Maniños, con apenas 5 renovacións respecto ao ano pasado: "Hubo moito cambio, promocionamos a un xogador do filial e buscamos xente xove noutras categorías. Hai que traballar moito durante a semana e darlles tempo para que fagan as cousas máis sinxelas e melloren a toma de decisións". O obxectivo para esta liga está claro: "O máis importante é facer unha estrutura de equipo desde cero, que sintan arraigo polo club, ir formándoos e ser cada vez máis competitivos para ir cara arriba si ou si". Preguntado polos favoritos do grupo, Adrián sinalou a históricos como o Victoria de Coruña, Olímpico, Marte, Torre ou Miño coma os principais candidatos ao ascenso.

Fotografía Xan Xe