Estas citacións están recollidas nun auto ditado pola xuíza en días pasados, e no cal se require á que foi nomeada presidenta honorífica da entidade que acuda presencialmente, debido ao volume da información recollida no sumario. Ademais, tamén foi chamada a declarar a filla de Dositeo Rodríguez, Covadonga Rodríguez, na súa condición de subdirectora da fundación e que figura no intercambio de correos electrónicos vinculados ao cesamento da relación laboral do que era director xerente da fundación.
A xuíza tamén imputou ao secretario da fundación, e, desta maneira, son un total de cinco persoas as chamadas a declarar entre o 21 e o 22 de xullo por supostos delitos de malversación de fondos públicos. Ademais, a Marina Castaño e Tomás Cavanna impútaselles fraude en subvencións e apropiación indebida.

O que foi conselleiro de Presidencia con Fraga e candidato do PP á Alcaldía de Santiago emitiu un comunicado no que deu a coñecer a chamada a declarar como imputado na súa condición de antigo patrón da Fundación Camilo José Cela. Rodríguez di que se lle imputa penalmente por considerar que o despedimento de Tomás Cavanna foi "simulado e pago con fondos públicos, sen consentimento das administracións que financiaban a entidade". Nesta situación, explica que o cesamento de Cavanna "foi válidamente aprobado polo padroado da fundación", co "beneplácito" da Xunta, e conforme ao plan de viabilidade financiado con fondos públicos con cargo á addenda do convenio entre a Xunta e a fundación, a través das xustificacións establecidas no propio documento.
Con todo, a xuíza sospeita que houbo unha simulación de despedimento do director xerente sobre a base duns correos electrónicos nos que estarían tanto Dositeo como a súa filla. Fronte a eles, Dositeo Rodríguez asegura que Cavanna "nunca expresou o seu desexo de cesamento voluntario, senón todo o contrario, sempre esixiu que se formalizase conforme aos estatutos da fundación e suxeito á indemnización que lle correspondese".
Tamén a Xunta de Galicia emitiu un comunicado de prensa na mesma liña de Dositeo Rodríguez. Nel, asegura que o cesamento do xerente era "un requisito imprescindible para garantir a viabilidade da fundación --tiña un custo de 102.000 euros anuais-- e apunta que a indemnización (de 150.000 euros) "realizouse baixo os mesmos parámetros de cálculo que o usado co resto de empregados". Segundo Rodríguez, ofrecéronselle 32 días por ano traballado, "igual cómputo de días" que se ofreceu aos traballadores despedidos en 2009 por "causas obxectivas".
O caso vén de mediados de 2012, cando o fiscal de Santiago, Álvaro García Ortiz, denunciou á viúva e ao ex xerente da Fundación Cela por un suposto delito de malversación de caudais públicos. A denuncia detectaba tamén "base" para investigar a posible comisión de delitos de estafa, apropiación indebida e outros, como fraude fiscal, polo desvío a unha sociedade privada das devolucións do IVE da Fundación Cela, que está exenta de tributación, así como por cargar a esta entidade cultural gastos privados. A investigación iniciouse por mor da denuncia presentada por Lola Ramos, unha veciña de Iria Flavia, localidade na que está situada desde o ano 1991 a institución. Ramos achegara á Fiscalía de Galicia información relativa a supostos transvasamentos de diñeiro efectuados entre a fundación, sen ánimo de lucro, e sociedades propiedade de Cela e Castaño.
Nunha primeira valoración de urxencia, o portavoz parlamentario do PPdeG, Pedro Puy, defendeu que non hai razón de "incompatibilidade" entre a nova situación xudicial de Dositeo Rddríguez e o cargo que ocupa no Consello de Contas.