Casais dirixiu duras críticas ás empresas lácteas, en xeral, e a algúns dos seus dirixentes, en particular. “Sufrimos o acoso permanente das industrias que non ven con bos ollos as cooperativas”, declarou, ao tempo que poñía como exemplo ao propietario de Leite Río. “No ano máis negro para os gandeiros, Jesús Lence presume de ter conseguido unha rendibilidade histórica”, asegurou o presidente do Consello Reitor de Feiraco, quen culpa da situación aos propios produtores: “Se conseguísemos unirnos, Lence dedicaríase a outros negocios”.

O futuro do sector, entende Jose Antonio Casais, pasa por crear un grupo de cooperativas e o primeiro paso cara ese obxectivo é o de adquirir a planta que Leche Pascual deixou en Outeiro de Rei. Nos micrófonos de Radiofusiòn, o dirixente de Feiraco amosouse optimista arredor do futuro dese proxecto que, segundo os seus cálculos, pode estar en marcha antes de final de ano. Malia as informacións contraditorias publicadas nas últimas semanas, Casais confía no apoio do Goberno galego.