Galicia protagonizou as sesións culturais que todos os anos organizan en Sainte Maure de Touraine, nas proximidades da cidade francesa de Tours. Instalouse no Château des Rohan unha exposición sobre a tradición, historia, cultura e futuro da comunidade galega e a súa relación con Europa. Houbo tamén música celta e proxección do documentario “Os fios da memoria” na sala Patrice Leconte da localidade. As xornadas desenvolveronse baixo o lema “La Galice et La France, la fin de la terre, un pays celte en Espagne”. Falouse do camiño de Santiago e da memoria histórica democrática coa presentación da banda deseñada "A morte nas fragas". Proxectouse un audiovisual realizado polo Consello da Cultura Galega arredor do presente e do futuro de Galicia.