Para a Confederación Intersindical Galega, a nova lei “nin promoverá a creación de emprego público”, nin posibilitará a recuperación dos dereitos das e dos traballadores, nin favorecerá a defensa dos servizos públicos.

A Área Pública da CIG posicionouse en todo o proceso de debate do proxecto de lei de Emprego Público en contra, por considerar que se trata, en realidade, dunha nova Lei de Función Pública Galega pero que non contempla o dereito á negociación colectiva nas administracións públicas; non recolle a recuperación dos dereitos laborais e económicos substraídos aos traballadores e traballadoras das administracións públicas; non promove a recuperación do emprego público en Galiza e tampouco recolle a defensa dos servizos públicos.

Moi ao contrario, a central nacionalista denuncia que esta Lei posibilitará “impulsar o desmantelmamento dos servizos públicos e camiñar cara unha administración totalmente dixital, onde desaparecerá a necesaria independencia dos empregados/as públicos/as no desempeño das súas tarefas”.