Cómpre recordar que o 26 de novembro de 2009 a Xunta de Galicia autorizou a superación de limite orzamentario e a reserva de crédito necesaria para a execución da depuradora. Despois do acordo acadado o pasado día 30 de xuño, entre Xunta, Ministerio e Concello de Vigo axustáronse as dispoñibilidades orzamentarias tendo en conta o tempo transcorrido, xustifica o Goberno galego nun comunicado.

O réxime de colaboración será o seguinte: Acuanorte licita, adxudica e dirixe as obras, a Xunta de Galicia cofinancia e asume as baixas e alzas das incidencias que se poidan producir ao longo da execución das obras e o Concello de Vigo será o titular das instalacións e asumirá a súa explotación unha vez rematadas as obras.

Respecto ao IVE, as instalacións serán entregadas por Acuanorte ao Concello de Vigo e, tal e como indica o convenio, o Concello ou a entidade por el designada para a explotación da actuación deberá aboar no prazo de trinta días desde a recepción da obra, os tributos que se devenguen pola entrega da infraestrutura hidráulica.

Unha vez asinado o convenio procederase á licitación das actuacións (por parte de Acuanorte), prevista para setembro de 2010.