Xuntos en Galicia por vez primeira. Así se anuncia a actuación desta noite, que concentrará aos primeiros espadas da tralla popular feita no Estado: Airbag, Los Reactivos e Los Summers, xunto cos ferroláns Van Cleef son os grupos que escoltan a un mítico cabeza de cartel: Un Pingüino en mi Ascensor. O madrileño José Luis Moro está en pleno revival do seu reinado nas listas de éxitos a finais dos anos 80. Na discoteca Zebra de Ferrol soará a partir das nove da noite clásicos como “Atrapados en el ascensor” ou “Espiando a mi vecina”. Non menos célebre que os grupos participantes é Juan de Pablos, o director do programa Flor de Pasión en Radio 3, que escolmará os seus discos preferidos para ofrecer unha sesión DJ. Á súa beira estarán para completar bailando a noite a ex teclista de Los Flechazos Elena Iglesias e o picadiscos galego Rafa Beatman. Mar e monte, pop para todos os gustos hai esta noite no festival “Tualmonteyoalmar” que se estrea en Ferrol.