A improvisación e a lentitude foron a tónica na xestión municipal no 2009 por parte do goberno encabezado por Iván Puentes, afirmou esta mañá en Radiofusión o voceiro do BNG de Fene, Manuel Polo. Exemplos desta falta de impulso e de paralise dos socialistas feneses son a non execución de obras xa aprobadas e que non se levaron a cabo. A construcción das vivendas sociais do Sartego, a traída de auga a Magalofes, a creación dun ximnasio no Instituto de Barallobre. A II fase do Polígono de Vilar do Colo, segue sen iniciar ao xurdir atrancos co trazado do Camiño de Santiago ao seu paso pola zona. Polo tamén subliñou a deixadez que está a sufrir o Centro da Terceira idade de Fene, uns traballos de mellora prometidos pola Xunta de Galicia.  

Desde o Goberno Central tamén se aprobou no 2006 a creación no noso concello dunha base de salvamento marítimo, e aínda non se moveu un anaco de terra para elo. Desde o BNG acusan directamente desta falta de impulso e de traballo ao rexedor fenés, pois sinalan que é Iván Puentes quen debe coordenar todos os departamentos e traballar alomenos para rematar o comezado e iniciar o aprobado .

Manuel Polo cualifica de inocentada o anuncio do alcalde na que informa que xa contan cun borrador dos orzamentos do 2010. O voceiro nacionalista sinalou que é a mesma canción de todos os anos e que nunca se leva  a cabo.

A ferramenta básica para unha xestión municipal eficaz son uns orzamentos ben planificados que inclúan un plan de emprego municipal complementario aos da Xunta. Un investimentos para levar a cabo obras programadas como a creación do auditorio municipal e que potencien a axuda á dependencia e ás familias con fillos con dificultades económicas.