Tanto o último académico en ingresar, Xosé Luís Regueira, que o fixo precisamente ocupando o posto deixado pola finada Olga Gallego, como o inmediato precedente, o tamén filólogo Henrique Monteagudo, coidan que a institución debe aspirar a unha maior presenza feminina. “Mesmo á paridade se se quere”, manifestou Monteagudo en Radiofusiòn. Porén, precisou que para chegar a ese obxectivo hai un “camiño lento”.

As explicacións dos académicos máis recentes non convencen a María Reimóndez, quen advirte que existe un “espellismo” que desacredita as explicacións que atribúen a pouca presenza feminina na Real Academia a un proceso histórico. A escritora lembra que os méritos das mulleres tiveron que loitar contra a “invisibilidade” e que por iso non se pode agardar a que se produza unha mudanza “por inercia”. As mulleres teñen que facerse coas cadeiras “provocando o cambio”, proclama.