Nesta ocasión, o manifesto que se lerá nas marchas de Queremos Galego é da autoría da escritora Marica Campo. As súas primeiras liñas din o seguinte: “O galego é a nosa lingua. A Galiza ten unha lingua de seu que é o galego. Por isto, non podemos tolerar  que no noso país, hoxe, o español, coa axuda do Inglés, se utilice como o seu sepultureiro. Até o Estatuto de Autonomía, que xa ten 33 anos, declara que o Galego é a lingua propia de Galiza. En boa lóxica, xa que é así, está na súa casa e non precisa permiso das outras,  impostas e alleas,  para se mover libremente polas diversas estancias”. 

As mobilizacións do 17 de maio comezarán ás doce do mediodía. O lugares escollidos son os seguintes: na Coruña, o Obelisco; en Lugo, fronte a estatua de Xoán Montes nos Xardíns de San Roque; perante a estatua de Blanco Amor na Alameda, no caso de Ourense; a praza da Peregrina en Pontevedra; Porta Faxeira en Compostela; a Vía Norte en Vigo; en Ferrol, na praza de Armas; e na localidade de Foz, na Mariña lucense, na praza do Conde de Fontao.