A través do programa de intervención familiar, o Concello dá “apoio socio educativo para reforzar o benestar de nenos e nenas, que son as persoas vulnerables”, apunta Pilar Couce. Este programa de intervención familiar pon a disposición das familias distintos servizos como mediación en casos de conflito, asesoramento en temas legais, intervención en situacións de malos tratos, ou derivación a programas de saúde mental, por exemplo. 

“É importantísimo que a familia pase a ser suxeito activo, que asuman o reto de vivir un proceso de cambio, o traballo que facemos nós basicamente é de acompañamento, apoio e de seguimento, pero os protagonistas sempre van ser eles”, detalla Adelaida. Algunhas persoas chegan ao programa por iniciativa propia, outras veñen derivadas por outros servizos, como colexios ou centros de saúde. O Concello de Fene conta cos recursos, aínda que non todo o mundo os coñece e sempre o primeiro paso é que a familia sexa consciente da existencia do problema, indica a coordinadora do departamento de Benestar Social e Igualdade, Pilar Couce.