As probas comezarán ás catro e media da tarde e poderanse ver e practicar de xeito libre, simplemente inscribíndose antes do comezo. O programa inclúe: empuxar o rolo de herba, carreira de leiteiras, tiro de corda e lanzamento de colmeira; máis billarda e bolos que serán competicións independentes. Os gañadores e primeiros clasificados das Olimpíadas Rurais recibirán trofeos e premios (produtos locais e artesanais) ademais de vales para adquirir comida e bebida para a cea. Ademais, grazas á colaboración da asociación de recuperación de xogos tradicionais Xotramu, durante a tarde tamén haberá moitos outros xogos populares, boa parte orientados para os nenos e nenas.

No tocante a grupos musicais, ás once da noite os meiregos PanZ serán os primeiros en subirse ao escenario, seguidos do grupo punk de Muros Terbutalina e Labregos do Tempo dos Sputniks, banda formada por García MC, O Leo i Arremecághona e Lydia Botana.

Eme de Meira tamén pon a disposición dos artesáns e produtores locais que queiran amosar e vender os seus produtos unha zona de mercadiño, hai habilitada unha zona de acampada gratuíta e tamén haberá servizo de bar e comida a prezos populares.