De Ferrol con destino a Lugo só saen dous autobuses de luns a venres, ás dez e media da mañá e as dúas e media da tarde. Tardan entre  unha hora e corenta minutos e dúas horas e cuarto. De Lugo a Ferrol, de luns a venres só hai un servizo ás seis e media da mañá. No curso académico tamén funciona un autobús o venres ás seis da tarde. A alternativa é coller o bus Lugo - Coruña e Coruña Ferrol. Ou o tren por Betanzos. Tres horas e corenta minutos ou máis de dúas horas. Tempos do século XIX para dúas cidades separadas só por 108 quilómetros de distancia.  
Estacións vellas
Pouco transporte e estacións vellas. A estación de autobuses de Ferrol languidece agardando por unha renovación. O tren tamén espera con servizos lentos e escasas frecuencias. Nas restantes cidades galegas, a Xunta xa acometeu a reforma das Instalacións. En Pontevedra os traballos adxudicáronse en 2019 e remataron en 2023. Vigo puxo en marcha a nova estación de tren e autobuses en 2022. En Ourense a ADIF xa adxudicou a reforma . Estará lista no 2029. Lugo, A Coruña e Santiago están na actualidade en obras e se prevé un inmediato remate para unificar e conectar estacións de autobuses e ferrocarrís para facilitar o intercambio de pasaxeiros.