O proxecto que licita o Concello de Fene contempla actuacións en distintos camiños como os de Fontelonga, o camiño en Sartego – Parque Castelao, o camiño en Sillobre próximo ao cemiterio e á avenida do Doutor Sixto Mauriz, o camiño por Almieiras, o camiño de accesos en Sartego e o camiño entre a estrada do Peirao e O Souto, todos eles con firmes deteriorados, con presenza de fochancas, disgregacións ou perda de capacidade estrutural. As obras consistirán na rehabilitación e mellora funcional dos camiños, mediante tarefas de limpeza e preparación das superficies, reforzo estrutural dos firmes, execución de tratamentos superficiais bituminosos e implantación de nova sinalización vertical. Segundo as previsións técnicas, estas actuacións permitirán prolongar a vida útil dos firmes arredor de dez anos.

A alcaldesa de Fene, Sandra Permui, destacou que “esta licitación responde á vontade de seguir mellorando a rede viaria municipal e dar resposta ás necesidades da veciñanza, especialmente nas zonas onde o deterioro é máis acusado”. Pola súa banda, o concelleiro de servizos, Adán Chao, explicou que “o obxectivo é optimizar os recursos dispoñibles e ofrecer solucións duradeiras que eviten intervencións constantes a curto prazo”. Destaca o Concello que estas actuacións forman parte dunha estratexia orientada ao mantemento e mellora da rede viaria municipal, contribuíndo a unha mobilidade máis segura e eficiente.