As intervencións, adxudicadas en algo máis de 61.500 euros, buscan renovar a infraestrutura de subministración de auga e garantir unha mellor eficiencia e seguridade. O proxecto contempla a substitución das actuais tubaxes de fibrocemento por novas conducións de polietileno de alta densidade, garantindo unha maior durabilidade, a redución de perdas de auga e, por conseguinte, unha mellor calidade no servizo. Durante o desenvolvemento das obras haberá cortes de tráfico temporais, que serán debidamente sinalizados, segundo declarou o concelleiro de Obras, Manuel Polo. Os traballos terán un prazo de execución duns tres meses.

Seguridade viaria

O Concello de Fene tamén realiza estes días traballos de pintado nas estradas do municipio co obxectivo de mellorar a mobilidade e a seguridade viaria. Durante toda esta semana, aproveitando o bo tempo, persoal municipal realiza labores de repintado de pasos de peón, zonas amarelas e espazos acoutados para persoas de mobilidade reducida.  Labores que se realizan dentro do plan de traballo que ten en marcha a Concellería de Servizos que dirixe Sandra Permuy.