O Concello de Fene rematou os traballos de incremento da sección de paso e a mellora na drenaxe na rúa do Campanario, na parroquia de Limodre. Unhas actuacións que afectaron a 300 metros da pista que une a entidade de poboación do Campanario coa estrada provincial DP-3501. Entre os traballos realizados destacan as labores de pavimentación nunha superficie de 95 metros cadrados, así como a instalación de 359 metros de tubaxe de saneamento e 22 sumidoiros en arquetas. Tamén foi mellorada a sinalización viaria co pintado en ambos lados do camiño para aumentar a seguridade, segundo destacou o concelleiro de Obras, Manuel Polo. A actuación ampliarase nesa zona nunha segunda actuación proxectada para comezar este mesmo ano.