“Procuramos desenvolver proxectos que teñan que ver co desenvolvemento sostible, coas enerxías limpas, e sobre todo coa xente maior e coa infancia”, manifestou a alcaldesa de Moeche, Beatriz Bascoy, que explicou as medidas que desenvolve o Concello para a aplicación da Axenda 2030.

Alumnos e profesorado do centro escolar falaron do proxecto educativo do colexio no programa “Moeche a pola Axenda 2030”. Expuxeron, por exemplo, o resultado dun dos proxectos educativos que realizan. Un estudo sobre a micro-toponimia do concello. Tamén tivo protagonismo o Xeo parque Cabo Ortegal. A concelleira e deputada provincial Cristina García destacou a difusión que significa para os recursos de Moeche. Da recuperación de tradicións populares falounos a Asociación de Labacengos. Foron algúns dos moitos protagonistas que pasaron polo programa especial de Radiofusión dedicado a Moeche e a Axenda 2030.