Moeche situase na vangarda comarcal na transición enerxética. É o primeiro concello de Ferrolterra cunha Comunidade Enerxética que ten executada unha instalación fotovoltaica. Logrouno logo de acadar a declaración de Concello piloto de Comunidade Enerxética Rural, o que lle permitiu obter financiamento europeo para investir na instalación fotovoltaica. Con ela xa instalada e próxima a entrar en funcionamento faise visible a eficacia dunha Comunidade Enerxética, que naceu impulsada polo Concello e grazas decisión dun grupo de veciños e veciñas que apostaron por este medio para subministrarse de enerxía con fontes alternativas, o que lles permitirá obter aforros económicos ao tempo que se favorece o medio ambiente.