Tamén a Jorge Juan celebra mañá mércores o Samain. Haberá túnel do terror, desfile de disfraces, degustación de castañas e mercado organizado por cuarto da ESO. En Sillobre andaina do medo e obradoiro de cabazas este xoves trinta e un de  outubro. As actividades comezarán ás seis e media da tarde no local da Sociedade Agarimo. 
As castañas, un produto natural, pódense adquirir nas froiterías de Fene. A Lela, Eurolider e Agronuquel ofrecen froitas e legumes desta época do ano. En Agronuquel véndese o quilo de castañas a 4,70 euros. Un prezo similar en A Lela. Chegarán as castañas da Capela mañá mércores. Este ano non hai moita castaña. A produción viuse reducida polos temporais, pero a calidade é boa, ao diminuír os fungos que outros anos atacaban máis. 
En Maniños, O Pote programa o magosto para o venres oito. Un día máis tarde, magosto en Barallobre. A Liga de Amigos en colaboración coa ANPA do Ramo programa un obradoiro de cabazas para a rapazada e xogos de mesa. Para participar hai que levar unha cabaza, unha culler, un pano da cociña e os adornos que se queira poñer. Hai que inscribirse ou mandar unha mensaxe ao 624657474. Comezará ás once da mañá. E xa pola tarde, castañas asadas e liscos. Actuará o grupo de canto da Sociedade presentando a nova tempada. En Barallobre o sábado nove de novembro.