O Castelo da Palma empezouse a construír en 1597 e remodelouse a mediados do século XIX. Durante moitas décadas, esta finca de 29.630 metros cadrados foi o cárcere do Exército de Terra. A Palma foi declarada Ben de Interese Cultural (BIC) en 1994 e, desafectada en 2001, cambiou de mans un ano despois. Poxouse por 1,4 millóns e foi adxudicada a Castelo da Palma-Mugardos, SA. Detrás desta sociedade, están o grupo coruñés Invertaresa, Maxi Logistic e a cadea Diana Grandes Hoteis. Os novos donos do castelo planeaban rehabilitalo e transformalo nun balneario de luxo a pé de ría con 80 habitacións tipo suite, spa e centro de convencións. Dez anos despois, o proxecto segue en diferentes dependencias da administración porque os seus muros adéntranse na ría, en zona especialmente protexida por Costas. O Concello de Mugardos agarda agora que no prazo dun mes a empresa presente o anteproxecto da execución da obra, o que supoñería o desbloqueo burocrático da iniciativa.