González apuntou que as conmemoracións do Día Internacional da Muller comezarán mañá, coa inauguración na Igrexa da Universidade de Santiago de Compostela da exposición de fotografía “Mulleres no obxectivo” e a proxección “Mulleres XX”, unha peza audiovisual sobre a muller galega e o traballo. O acto principal da campaña será a presentación do fondo bibliográfico “Concepción Arenal de Estudos das Mulleres” que terá lugar o 7 de marzo na Biblioteca de Galicia, na Cidade da Cultura, e na que se presentarán tamén os tres primeiros volumes da obra colectiva “Historia das Mulleres en Galicia”.

Pola súa banda, a secretaria xeral de Familia e Benestar, Susana López, presentou os primeiros resultados do estudo “Xénero e Discapacidade: Aproximación á situación das mulleres con discapacidade en Galicia”. Segundo este, as mulleres con discapacidade sofren a chamada “dobre discriminación” e atopan atrancos na propia familia, pola sobreprotección e o mantemento de roles tradicionais; no eido da participación social; e nas relacións de parella, existindo reticencias por parte da familia a seren informadas. O estudo conclúe tamén en que as mulleres con discapacidade son as máis vulnerables perante a violencia de xénero e os abusos sexuais.