O Concello de Fene aproveita o 8M para darlle visibilidade o labor das mulleres que participan no movemento asociativo. “Son o motor”, destaca a concelleira de Igualdade Sandra Permui, que agradeceu o labor das mulleres implicadas no funcionamento das sociedades. Canda ela, Eva Fraga, de Agarimo Sillobre; Ana Santiago, de Limodre; María José García, de Maniños; Paula Romero do CMI Unidade de Fene, e Pepa López de Barallobre falaron en Radio Fene da presenza das mulleres nas sociedades, da súa importancia para manter o tecido asociativo e do seu compromiso coa comunidade.

“Elas, escríbese en feminino”. Lema das actividades que celebra este venres o Concello de Fene con motivo do Día da Muller. A iniciativa busca recoñecer e visibilizar o papel fundamental das mulleres na historia, na sociedade e no desenvolvemento comunitario, poñendo o foco na súa memoria, traballo e loita pola igualdade.