De maior quere ser arquitecto ou autor de cómics. Un profesor seu di que estamos no punto exacto para frear o cambio climático, despois sería irreversible. Diego é algo tímido pero fala de marabilla cos seus debuxos e ten un sentido do humor moi afiado. Hai dous anos gañara o premio da categoría infantil con un Xeriátrico de Robots e agora, con 13 anos, volveu gañar na categoría xuvenil. A súa historieta dun home que non cre no cambio climático, pero acaba maldicíndoo, chámase “O negacionista”.  O xurado valorou na obra de Diego Noguerol a excelente capacidade narrativa e o manexo dos tempos do autor; o equilibrio entre guión e debuxo; a técnica de rotulación, entintado e cor e a limpeza no acabado. Tamén salientou o interese pola memoria, con referencias ao afundimento do Prestige; e os diálogos da historia nos que demostra a súa capacidade de síntese. A entrega de premios terá lugar o vindeiro 29 de xuño, ás 17 horas, no Museo do Humor Xaquín Marín.