A chegada dun sistema frontal, unido a unha cota de neve en torno ós 400 metros de altura, deixará acumulacións superiores ós 2 cm de neve en puntos de Lugo e A Coruña e no interior de Pontevedra e de máis de 5 cm na montaña de Lugo.

Mañá seguerán a soprar os ventos do norte que traerán máis aire frío, polo que a cota de neve baixará ata os 200 metros de altura. Ademais, os ventos do nordés soprarán con intensidade e a mar de fondo superará os 3 metros no litoral da Coruña durante a tarde.

Co fin de garantir a seguridade dos bens e as persoas, a Dirección Xeral de Emerxencias e Interior, a través do Centro de Atención ás Emerxencias 112 Galicia, informou da situación de meteoroloxía adversa a todos os concellos, policías locais, bombeiros e Deputacións das provincias da Coruña e Lugo, así como aos servizos provinciais de Protección Civil da Consellería de Presidencia, Administracións Públicas e Xustiza, á Administración Xeral do Estado e ás empresas de ámbito galego.

Tamén, recórdaselle á poboación a importancia de seguir as medidas de autoproteción de acorde coas especificidades climáticas descritas, tales como son evitar as viaxes sempre que non sexan necesarias ou revisar o estado das estradas asegurándose de saír con cadeas e os depósitos de combustible e líquido anticonxelante cheos.