“Era inviable por seguridade e vaise a peor na sostenibilidade”, apunta o patrón maior de Barallobre. Coa nova normativa, as embarcacións a partir de 12 metros tiñan que avisar con catro horas de antelación da chegada a porto. “Imaxinaivos un día de temporal e o barco parado agardando para atracar”. O acordo acadado co ministro de Pesca non é definitivo, hai pendente unha reunión o día 26 para que a Unión Eurpea autorice a flexibilización das medidas que gran parte do sector considera insuficiente. “En Galicia máis da metade das confrarías non están de acordo, certo que é hora de negociar”, asegura Jorge López que lamenta o descoñecemento do sector que teñen as persoas que toman as decisións. “Fáltalles saber como se pesca, con que meteoroloxía se pesca, como traballamos, non todos os barcos son iguais, piden que teñamos unha oficina dentro dun barco de sete metros”.