I“O ensino é o futuro e o alumnado estuda alí nunhas condicións pésimas e lamentables”, destacou a alcaldesa. Sandra Permui urxiu á Xunta a acometer dunha vez o arranxo do IES de Fene, unha demanda da comunidade educativa e do Concello de Fene que vén de vello, como lembrou a alcaldesa.“Fixemos varias visitas ao centro e xa non é que non se cumpran as condicións, ata é perigoso para a saúde”, denunciou a rexedora que anima á veciñanza a dar o seu apoio á campaña da ANPA que ten en marcha unha recollida de sinaturas. “Eu xa asinei, como alcaldesa e como veciña, por desgraza levamos moitos anos avisando do mal que está o edificio C”. 

Manuel Golpe comprometeuse coa rexedora a seguir presionando á Xunta co tema no Parlamento galego. Lembrou que “en febreiro, cando levou as demandas Mon Fernández á Comisión de Educación, o PP votou en contra, dicían que había comprometidos cartos para a rehabilitación pero aínda non se moveu nada, nin un folio non xa un euro”.