O convenio asinado entre o Concello e a Xunta ten como obxectivo fundamental mellorar a mobilidade e accesibilidade no contorno da área metropolitana e, polo tanto, que os cidadáns dispoñan dun mellor servizo público colectivo que sexa unha alternativa competitiva e eficiente ao transporte privado.

Para acadar ese obxectivo a medida máis salientable é a redución no prezo dos billetes que deben aboar os usuarios e que pasarían a custar 71 céntimos o que supón unha rebaixa de case o 50% xa que o traxecto en autobús Vigo-Redondela custa a día de hoxe 1’40 céntimos.

Ademais este plan de transporte prevé que o usuario poida empregar co mesmo billete varios medios de transporte no prazo de 45 minutos “o que permitiría a un veciño de Redondela desprazarse á cidade de Vigo e unha vez alí coller un segundo autobús para moverse polo centro urbano sen un custe adicional”.