"Nas cantinas e nas festas dos roxós cantábanse as coplas do Comandante Moreno" afirmaron algúns dos asistentes á xornada no coloquio establecido arredor da matanza do Acevo acaecida en outubro de 1937 cando os golpistas acabaron coa vida dos compoñentes do Batallón Galicia cando se dirixían á Coruña. Que facemos agora coas coplas? preguntouse a profesora Noelia Bueno que puxo en marcha a iniciativa "Memoria oral na Fonsagrada. As coplas do comandante Moreno". "Non coñezo outro caso no Estado español no que se manteña a lembranza duns sucesos como a matanza do Acevo a través dunhas coplas de transmisión oral" manifestou Carmen García. No acto tamén interveu o historiador Eliseo Fernandez quen cualificou o romance como "un documento excepcional". Os oradores coincidiron en destacar o valor enorme de toda a poboación que transmitiu as coplas. "Cada unha das trinta entrevistas realizadas arredor deste proxecto foi emocionante" concluíu Noelia Bueno. 

Recuperación

Entre outubro de 2007 e marzo de 2008 a Asociación para a Recuperación da Memoria Histórica recupero os corpos das persoas que foran asasinadas no porto do Acevo na Fonsagrada en outubro de 1937. As mortes de Jose Moreno Torres e dos seus compañeiros non estaban documentadas oficialmente e a maioría dos seus fammiliares perdera a pista do seu paradoiro desde o golpe de estado de 1936. A exhumación dos combatentes do Batallón Galicia, foi facilitada pola conservación na memoria popular do "Romance do Comandante Moreno", unha composición popular que se fixera a raíz dos luctuosos sucesos do Acevo.