A Concelleira de Benestar Social, Aurora Varela, fixo unha invitación a todos os veciños para que se acheguen o próximo venres ata o recinto feiral, onde "poderán participar dun ameno discurso que percorrerá a historia das relacións de parentesco en Galicia, dende a familia extensa que durante anos foi núcleo fundamental no noso país ata o novo concepto de familia nun entorno máis industrializado".

Os convidados que asistan a esta charla poderán gozar dun viño galego ao remate desta. Tamén dende o Centro de Información á Muller está previsto iniciar o vindeiro día 22 deste mes de maio un curso de cociña para homes. Os 15 participantes poderán descubrir de man de expertos os segredos culinarios para a elaboración de diferentes e exquisitos pratos.

Aurora Varela aproveitou para facer pública unha nova actividade dentro do programa de dinamización das parroquias que se vén desenvolvendo dende o pasado ano; nesta ocasión está prevista a organización dunha viaxe para a xente maior do rural ao acuario da cidade da Coruña; terá lugar este venres día 15; a saída está prevista para as tres da tarde ao carón do Recinto Feiral.