Este ano presentarán no Outlet roupa deportiva, pero tamén calzado e accesorios. Teñen previsto ofrecer descontos de ata o 50% e, por se fora pouco, unha serie de artigos seleccionados que porán á venda a 10, 15 ou 20 euros. Malia as negativas repercusións que sofre o sector pola carestía de prezos  e a inflación, a titular de Más Sport, Marta Peña, destaca a vitalidade do comercio local de Fene. E defende, tamén, a importancia de iniciativas como o Outlet para a dinamización do comercio de proximidade. Organiza o Concello de Fene coa colaboración da asociación de comerciantes O Cruceiro. Quen aproveite o Outlet para achegarse a Más Sport vai ter a oportunidade de facerse con algunha ganga, mesmo para o vindeiro curso escolar, e, ademais, poderá descubrir na tenda un avance para a nova temporada, na que, segundo nos anuncian, primarán as cores granate e rosa na roupa deportiva feminina.