A fin do verán provoca o incremento do paro rexistrado tamén en Galicia. O número de persoas apuntadas nas oficinas de emprego do país queda en 194.336 tras aumentar en 1.291 (+0,67%) no pasado setembro con respecto ao mes anterior, un aumento case idéntico ao experimentado no conxunto do Estado (+0,62% e 22.801 persoas). No entanto, o mercado laboral galego volve amosar a súa febleza. A comunidade perdeu no pasado mes 6.218 afiliados á Seguridade Social, cinco veces máis do aumento do paro rexistrado. Pola contra, en España a cifra de cotizantes medrou en máis de 12.000 malia o medre tamén do desemprego.