O valor da autopista, segundo o último balanzo do Ministerio de Fomento é de 1753 millóns de euros. A concesionaria ingresou no 2017, un total de 156 millóns de euros. Segundo os cálculos da administración, dende hoxe a cando remate a concesión no 2048, a firma ingresará ainda 14.556 millóns de euros máis. Os usuarios xa deixaron nas cabinas de peaxe 2.865 millóns de euros. De chegar a ser realidade a previsión de negocio, o peto de Audasa multiplicará por dez o investimento realizado na construción da AP 9.

A concesión da autoestrada do Atlántico remataba no ano 2023. Sendo Manuel Fraga presidente da Xunta, e gobernando no Estado o Partido Popular, aprobouse renovar e prolongar a concesión da AP-9 até o ano 2043. Fíxose a cambio da construción dos nove quilometros do tramo de autoestrada entre Fene e Ferrol.  A obra contaba cun orzamento de 120 millóns de euros e inaugurouse en decembro de 2003. O Estado correu co custo das expropiacións. Como os beneficios anuais da AP-9 rondan os 60 millóns de euros, ao remate da concesión a cambio do investimento de 120 millóns, Audasa obterá un rédito de 1200 millons. Un enriquecemento ilícito, segundo calquera observador independente.