O galeón de Ribadeo, O San Giacomo di Galizia, tiña 34 metros de eslora cunha capacidade de carga de 1.200 toneladas e un cento de tripulantes.  Para traslado de tropas podía levar trescentas persoas máis. O San Giacomo afundiuse en Ribadeo o 13 de novembro de 1597. A tripulación e a tropa desembarcou auxiliada pola poboación da zona. O barco fora construido con carballo das inmediacións de Vesubio en Italia en 1590.

Mergulladores da Armada Española, pertencentes á Unidade de Mergullo de Ferrol (UBUFER), en coordinación co Servizo Arqueolóxico da Xunta de Galicia e un equipo internacional de arqueólogos, realizaron unha campaña de dúas semanas en augas da Ría de Ribadeo, para levar a cabo unha profunda investigación sobre os restos do pecio San Giacomo dei Galizia coñecido como Galeón de Ribadeo.

O equipo de mergulladores da UBUFER, conforme ao Plan de Protección e Vixilancia do Patrimonio Arqueolóxico Mergullado da Armada, en coordinación co Servizo Arqueolóxico da Xunta, achegou un equipo de mergulladores e diverso material para colaborar nas tarefas de procura e localización dos restos mergullados.

O proxecto está financiado pola Xunta de Galicia e dirixido polo arqueólogo Submarino e doutor Miguel San Claudio Santa Cruz, o cal dirixe un equipo de arqueólogos de diferentes nacionalidades e especialidades, entre os que se atopa a doutora Ana Crespo Solaina, pertencente ao Consello Superior de Investigacións Científicas (CSIC).