Tras unha longa traxectoria televisiva, os tres humoristas que protagonizan “Star Tres” subiranse ao escenario competindo para facer rir ao público cun número diferente que ten como temática tres historias e un nexo común: a gargallada.

Un espectáculo de dúas horas de duración con tres estilos independentes. Un deles, o de Isabel Risco, contacontos, monologuista e actriz de programas e series da TVG como Land Rober, Air Galicia, O show dos Tonechos ou Padre Casares. Deuse a coñecer na pequena pantalla tras o seu paso polo programa O rei da comedia e ten participado en diversas longametraxes e curtametraxes como Os mortos van á presa e Koruño, legado de Hércules.

Pola súa banda, Isi foi gañador de O rei da comedia e participou en numerosos programas da televisión autonómica galega (Supermartes, Land Rober...). É actor de teatro, monologuista, contacontos e pregoeiro das festas de numerosos pobos de Galicia.

Finalmente, David Perdomo compaxina na actualidade o seu traballo teatral coa televisión, onde comparte escea con X. Antonio Touriñán, Roberto Vilar, Isabel Risco e Isi no exitoso late night Land Rober. Traballou como actor en Zapping Comando, Avenida de América e participou tamén en longametraxes, curtametraxes e documentais como Diario de un skin ou Koruño, legado de Hércules.