“Podemos demostrar que a danza é accesible a todos os públicos. O problema está no seu descoñecemento” afirmou en Radiofusión Estefanía Vázquez de Artestudio. Con esta fin sacan, estes tres días, a danza á rúa para que a xente se tropecé e “se empape” dela. O nome do festival, Empape, fai referenza ás características de A Coruña, pola súa choiva e por estar rodeada de auga.

O encontro internacional de danza en paisaxes urbanas (Empape) inaugúrase mañá, ás sete e media da tarde, na Praza de María Pita, coa Compañía Integrada Multidisciplinar de Portugal. Destaca a participación, ao longo do festival, da compañía Entremans, a formación Produccións L.A, a Agrupación Nova Galega de Danza, a bailarina cubana Maura Morales e o Rootlessroot de Grecia.”Queremos que haxa propostas de todo tipo con pezas curtas de oito ata quince minutos", precisou Vázquez.

O festival complementarase con actividades paralelas como talleres de afrocontemporáneo, talleres de chan e ensaios abertos. As montaxes coreográficas trasladaranse desde os seus espazos habituais, como teatros e auditorios, a escenarios tan suxerentes como a Praza de María Pita, o Castelo de San Antón, a Torre de Hércules, a estatua de Breogán ou os xardíns do Palacio Municipal.