Fernando Fernández Rego lanza Andrés do Barro, a xénese do Pop en galego (Galaxia), obra que reivindica ao músico ferrolán como o artífice do pop na nosa lingua e suxire dedicarlle o Día das Letras Galegas. O libro destaca o fito histórico de acadar catro número un nas listas estatais entre 1969 e 1972, (O tren, Corpiño xeitoso, San Antón e Pandeirada) competindo con artistas internacionais pese á censura da ditadura, que burlou cantando O tren simulando que empregaba o idioma portugués.  

En 2020 descubriuse un master con cancións inéditas do autor de O tren. Máis alá dos seus grandes éxitos hai un Andrés Dobarro descoñecido para o gran público. 

Andrés do Barro (Ferrol 1947-Madrid 1989)  marcou un fito histórico entre 1969 e 1972 ao situar catro cancións en galego no número un das listas de vendas españolas, converténdose na primeira icona pop da cultura galega en plena ditadura. O escritor Fernando Fernández Rego destaca no seu novo libro este éxito sen parangón, que superou a división da época entre a canción política de Voces Ceibes e o folclore oficial para lograr un recoñecemento masivo.