Un guión previsto e máxima igualdade

O encontro transcorreu polas canles que agardaba o técnico visitante, Adrián Martínez. Os primeiros vinte minutos foron de dominio territorial do Perlío, pero o Maniños non tardou en facerse co control do balón. Mentres os locais agardaban repregados para saír en transicións rápidas, o Maniños trataba de atopar oco nunha defensa moi sólida.

Aínda que o perigo roldaba as áreas con balóns colgados por parte do Perlío e algunha incursión de Julián para o Maniños, a falta de puntería fixo que o marcador non se movera antes do descanso.

Un golazo para decidir a eliminatoria

Tras o paso por vestiarios, o escenario cambiou axiña. Adri executou unha falta maxistral que se coou na portería local, un "auténtico golazo" en palabras do seu adestrador, que deu aos de Maniños a tranquilidade necesaria para afrontar o resto do choque.

A pesar dos intentos do Perlío por igualar o marcador nos minutos finais, a seguridade defensiva do Maniños —cun Mateo moi atento baixo paus— evitou calquera susto. Os visitantes puideron incluso sentenciar antes o partido se estiveran máis finos no último pase, pero o 0-1 foi suficiente para certificar o obxectivo.

Recta final con alicientes

Con esta vitoria, o Maniños mantén viva a ilusión nesta recta final de temporada. "Era moi importante para nós seguir na Copa para ter máis alicientes", recoñeceu Adrián Martínez ao remate do encontro, visiblemente satisfeito polo traballo dos seus xogadores.

O cadro de semifinais complétase cos equipos,  O Val de Narón, Galicia de Caranza e Rosalía de Vilaboa, que acompañarán ao Maniños na loita por erguer o trofeo.

Fotografía Xan Xe