“Creo que é posible, pero eu son un optimista, senón non me dedicaría a isto”, ironiza o presidente da Asociación Galega de Editoras. O principal problema do sector é un índice de vendas “moi baixo, moi por debaixo do catalán e o vasco”. Os números cantan, “se vendemos o 8% de libro galego quere dicir que o castelán vende o 92%”, detalla Miguel Toval.

A lingua

A debilidade da industria editorial galega contrasta co gran nivel creativo dos autores. “O sector é moi potente a nivel creativo, pero non se reflicte nas vendas”, explica o responsable da Editorial Embora.  A causa é clara “ten que ver coa situación do idioma, o principal problema no sector cultural, non só no editorial, é a situación do idioma: perde falantes e prestixio social”.